一直都有好多人問我，究竟幾時同點樣教小王子認字同睇書。
老實講～雖然我係由細就陪養小王子睇書嘅習慣，但係到最後小王子可以認到咁多字，最重要都係要靠小王子自己嘅，但係我可以o係度同你地分享下，我究竟係點樣陪養小王子睇書嘅習慣。
其實小朋友好細個就可以開始教佢地睇書ga na，不過能5能夠成功呢～就因人而異o勒！因為性格係生成嘅，個小朋友係好動定好靜，真係5係父母可以控制。好似耐性同集中力呢d o野，我地做父母嘅，淨係可以引導，係5可以更硬嚟，因為有d小朋友嘅集中力，真係比較弱嘅。不過就算你真係有個無咩耐性嘅小朋友都5好灰心，無錯你係會比其他人教得辛苦d，但係我一直都認為我地做父母嘅責任，就係要扶助我地嘅寶貝，將佢地嘅長處發揮到極點，而佢地嘅短處呢，就要幚佢地將佢降至最底，盡量5好比佢地嘅短處成為佢地嘅絆腳石。呢個就係我一直嘅座右銘。
小朋友細嘅時候，可以試下比個波仔佢自己搾住，叫佢將個波仔拋上去、然後接住，呢個過程小朋友對眼要望實個波，拋上去望上，到個波跌落嚟對眼就要跟住個波望返落嚟。總之要將個視線跟實個波。點解要咁？呢個練習係訓練小朋友閱讀嘅時候，對眼可以一行行跟住d字嚟睇，5好睇小呢個練習，對小朋友嚟講，要對眼跟住一行一行字嚟睇係一d都5容易ga！有d做5到呢樣o野嘅小朋友，睇小說都要用把簡尺一行一行咁簡住嚟睇ga！
小王子由兩三個月大開始，我就晚晚都講故事比佢聽ga o勒，咁當然佢o個時5識聽la～但係我就係想佢有聽故事呢個習慣，所以好細個就開始講故事佢聽。
初初開始教小朋友睇書，最好揀d好少字，頁頁都係寫差5多嘅字嘅嘅書，eg，I am a boy、I am a girl、I am a dog........頁頁都係咁嘅～
o拿！呢d書頁頁都係得一個字5同嘅，其他字都係一樣，而o個個5同嘅字﹣﹣＞eg. girl、boy、dog呢～就係o係o個頁度有個女仔呀～男仔呀～狗呀咁嘅圖畫，咁小朋友就會因為頁頁都有"I am a"呢幾個重復嘅字而記得呢幾個生字，而girl、boy、dog呢d5同嘅字呢～就會因為佢隔離o個個圖畫而令小朋友學識呢幾個字。
不過初初教小朋友認字，最 最 最緊要係你一路讀比佢聽，就要一路用隻手指指住d字嚟讀，咁小朋友至會知就你讀o個個發音係邊個字，同埋佢地至會有reading係由左至右，同由上至下咁讀嘅concept ga！到你讀完就可以一隻隻字咁指住比佢地自己上下讀。之後o個兩年你都要佢一路讀、一路用自己隻手指仔指住d字，道理係一樣，除左可以令佢地知道reading係由左至右，同由上至下咁讀之外，就係可以令佢地記得個字形同呢個字形究竟係點發音嘅！
5好心急！初初學睇呢d咁淺嘅書個過程係會好耐ga，5係一兩個月就可以換深d嘅書比佢地睇ga！佢地要睇呢d咁淺嘅書睇到熟到嘔至可以換深dd咁多嘅書佢地睇ga！
當然你講故事比佢聽o個時就5洗咁用手指住d字比佢睇la～不過每晚至少要同佢一齊用呢個方法讀一本書。初初學係會學得好慢嘅，不過5好灰心，因為當佢地一學識左呢個模式同道理，就會突然間進步得好快ga na～
要陪養小朋友鍾意睇書重有一個方法，就係買d講有關小朋友愛好嘅書o勒～好似小王子細個好鍾意車，我就見竟親車嘅故事書都買比佢睇，o個時小王子真係差不多成個書架都係車車書嚟ga！佢鍾意車自然就會想睇，就算o個時小王子未識睇字，佢都會打開本圖畫書嚟睇d圖畫，自然地，小王子又會好好奇本書架車車究竟發生左d咩事呢？初頭係會要你講ga，不過整整下佢地就會想自己學識睇ga na。呢個方法我教過我一個舊同學，佢都話work喎！而家佢個仔6歲，一樣都好鍾意睇書啫～
除左買d投其所好嘅書之外，o個時我會買d有書跟埋嘅故事CD比小王子（兩三歲開始），小王子坐親車我就會播張CD，而本故事書就會比小王子搾住睇，呢類形嘅CD故事書，好多都會o係要轉第頁o個時出d特別嘅聲，例如貓叫呀咁，係提小朋友而家講到第頁na，要揭第頁na。當然本故仔書咁多字，o個時小王子睇5明，但係本書有圖畫，又有貓叫聲要你自己揭第頁，呢個其實已經係一個互動嘅形式，張CD聽完又聽，整整下小王子直頭可以一字不漏咁背左個故事出嚟，佢一路睇住d字、一路聽住個故仔、重要識背喎～o拿！咁樣佢會學到d字ga na。
重有就係由小王子好細個o個時，我每日都要小王子分一d時間，自己o係房度睇書，o個時我時時都會問小王子﹣﹣＞"你今日睇左書未呀？"
我想小王子明白，睇書係好似刷牙、洗面咁，係日日都必做嘅事，整整下佢就會習慣每日都要有睇書嘅時間。o個時就算小王子未識字，佢都會o係房度揭開本書嚟睇圖畫，所以5係一定要識字至可以睇書ga！
講返今日個"嘩Box"先下～除左有雜菜飯之外，我今朝重整左小王子最愛嘅焗黑椒雞軟骨，自從上次小王子o係HK度食過雞軟骨之後，簡直直係即時愛上左呢樣o野呀！所以我而家久5久都會本雞軟朋比小王子食ga！
